Дзе мой край?
Там, дзе вечную песню пяе Белавежа,
Белы ветразь на сініх, на гордых, як мора,
азерах,
І бары-акіяны, і неба-разлівы
ільноў.
У.Караткевіч

   ...Беларусь - адметны край на планеце. Надзелены ен магутнай плынню духоўнай энергіі — духоўнай культурай, якую можна параўнаць з пшаніцай. Пшаніца харчуе чалавека, але і чалавек, у сваю чаргу, дбае пра пшаніцу, адвяваючы ў свірне зерне. І запас зерня зберагаецца, як спадчына, ад жніва да жніва.
   Адказнасць за развіцце духоўных і маральных каштоўнасцей нацыі, культуры і традыцый нашых продкаў, зберажэнне мастацкай скарбніцы нашай беларускай зямлі — ганаровая місія, дадзеная звыш.
   Беларуская культура — гэта спадчына, якая адыграла выключную ролю ў самазахаванні беларусаў як этнасу, адлюстроўваючы яго гістарычныя вытокі і першародную сутнасць. Народ заўседы выступаў сапраўдным творцам і носьбітам самабытных этнакультурных традыцый, якія беражліва захоўваў, развіваў, перадаваў як сакральны дар у спадчыну сваім нашчадкам.
   Менавіта беларускай культуры ўласцівы непасрэднасць, першародная чысціня, глыбокая маральнасць і непаўторны нацыянальны каларыт.